1Th 3 | WSK | STEP | Ana nina nego ko ikia ninguru nanga moakaso, se bo ago kimi betenakko me terong. Se ana ikiman, ani Silas ilak nangata Athens baganakko terong,

1 Thessalonians 3

Paul Timothy beteram se Thessalonica alo sail nungarukko nongote namaram

1 Ana nina nego ko ikia ninguru nanga moakaso, se bo ago kimi betenakko me terong. Se ana ikiman, ani Silas ilak nangata Athens baganakko terong, 2 se nanga bo Timothy, nangarak Kaem ko ura ilu se Kristus ko dugu duap apuso, mu nengete beteman, nu namuruk ale ninga sanguk se ninga nengemang ningi nunguning aurokko. 3 Ninga bita maguwusan mu ko nina saki ira to peleral bore ko. Nina ikisan, Kaem ana ikup yaman uwutata mu ginakko nanga balam. 4 Tom ana nina nengerak baga se mu, anananga bita maguwumonko mu ninga manaru lagakasan. ^{▼▼1 Thes 3:3-4 Kris alo ikup gimonko: Acts 14:22; 2 Tim 3:12.} Se nina ikisan, mu uwutata aratam. 5 Se borta ko, ani bo karogo kimi bitirikko me terong, se ani Timothy nengete beterem se nengemang ningi nunguning arigokko namaram. Kari memek Satan ninga ira arigok ninga kulok se anananga ura dagulok bore ko ani nguangakasam.

Timothy den yawara ago tairam se Paul amilmilakaso

6 Bare aitak Timothy ninga beteram ale den yawara ago nangate peleram tairam ale balam, nina nengemang ningi nunguning ilukuawuwasan, ale ninimi ko kuesan mam. Ale nu nanga maonam, nina nanga kuesan ale tom suen biya ana nago ko ningamin tugu se bagasan. Ale ana ningarkanakko kuesan iwitatala, nina nangarkalko kuesan.

7 Se aga singsang, ana nenenga den umutang ikiman, mu den mu ana ikup yaman suen biya giwasan imi ningi sokel nangaram. Mu awuk, nina nengemang ningi nunguning ago bagasan. 8 Nina Kari Biya te sokel ago bagasan, se ana umutang ko marak ago bagasan. 9 Ale ana nina ningimik te Kaem koma te ninguru amilmilasan, ale nina nego ko nu ninguru amilmil tusan. 10 Turom woremkalal ana ninguru nunguningkiri nu aru manorsan, ana aking ningarkanak, ale ninga nengemang ningi nunguning sokel bo agotala tunak se mutim gotektek aniso agi mu nama sisi sapurukko.

11 Anananga nangamang nanga Ba Kaem, nanga Biya Jesus ilak lage nungurmon se nengete tainakko. 12 Nina ninimi ko kuesan mu ko ana amilmilasan. Ale anananga nangamang Kari Biya ninga sanguk se ninimi nengemang tua ko munan biyala nengete anirukko. Mu te ana nenenga kuesan iwitata, nina ninimi ko kua se saki alo ninguru nunga kueralko. Anananga nangamang nu uwutata ninga sanguk ale nengemang sokel tuokko. Se udagi te nanga Kari Biya Jesus ko kariimet kako ^{▼▼1 Thes 3:13 Bala bo mu iwita: “Kari Biya Jesus ko engel kako alo suen la arungu tairuk...”} suen la arungu tairuk, mu nina nanga Ba Kaem koma te memek bo mena kako nunguningkiri bagaralko.

13